३ मंसिर, तनहुँ ।
पृथ्वी राजमार्गकाे तनहुँ खण्ड अन्तर्गत छिर्कनदेखि देउरालीसम्मकाे सडक रातकाे समयमा बन्द हुने भएकाे छ । मुग्लिन-पाेखरा सडक विस्तार आयाेजनाकाे पूर्वी खण्डमा निर्माण कार्यलाई तीव्रता दिन रातकाे समयमा सडक खाली गरि काम गरिने आयाेजनाले जनाएकाे छ ।
आज रातीदेखि मंसिर २३ गतेसम्म सडक बन्द गरेर काम गरिनेछ । राति ११ बजेदेखी विहान १ बजेसम्म सडक पूर्ण रुपमा बन्द गरी सडक निर्माणको काम गरिने भएकाे हाे ।विहान १ बजेदेखि साढे १ बजेसम्म सडक आवगमन खुल्ला गरिनेछ । यस्तै, दोस्रो चरणमा विहान साढे १ बजेबाट ४ बजेसम्म सडक बन्द गरी सडक निर्माण हुनेछ । त्यसपछि दिनैभर सडक पूर्ण रुपमा सूचारु हुनेछ ।
अत्यावश्यक सवारीवाहेक अन्य सवारी साधनका लागि उक्त सडक खण्ड पूर्ण रुपमा बन्द रहने जनाइएको छ । यो अवधिमा सवारी रोक्दा र सवारी चलाउदा कडाईका साथ आफ्नो लेन अनुशासन कायम राख्नु आयोजनाले अनुरोध गरेको छ । सवारी लामवद्ध भएको अवस्थामा जथाभावी ओभरटेक गरे कडा कारबाही हुने सूचनामार्फत चेतावनी दिइएको छ ।