काठमाडौं । स्वर किन्नरी तारादेवीको १७ औं स्मृति दिवसमा ‘सम्झनामा तारादेवी’ कार्यक्रम गरिएको छ ।
तरादेवी स्मृति फाउण्डेसनले काठमाडौंमा गरेको कार्यक्रममा ज्ञानु राणाले धर्मराज थापाको शब्द तथा संगीत रहेको तारादेवीको गीत ‘कालीपारे दाइ’ गाइन् ।
यसैगरी गीता पाण्डेले ‘हराएझैं केही लाग्छ’, जीना रसाइलीले ‘आमा भएर बाँचिहेर’, प्राश्ना शाक्यले ‘उकाली ओरालीहरुमा’, संगीता शाक्यले ‘फूलको थुंगा’ गीत प्रस्तुत गरे । अन्य गायक-गायिकाले पनि तारादेवीका कालजयी गीतहरु गाएर सुनाए ।
कार्यक्रममा गीतकार यादव खरेल, संगीतकार माणिकरत्न स्थापित र गायिका सुशीला कंसाकारलाई तारादेवी स्मृति सम्मान प्रदान गरियो । पुरस्कारको राशी २५ हजार रुपैयाँ छ ।
सन् १९४६ मा काठमाडौंको इन्द्रचोकमा जन्मिएकी तारादेवीको सन् २००६ मा निधन भएको थियो । नेपाली संगीतमा कालजयी गीत दिएकी उनलाई स्वर किन्नरी उपाधि दिइएको थियो ।