पोखरामा ग्यासको कृत्रिम अभाव खडा नगर्न मेयर आचार्यको आग्रह ; ५० हजारभन्दा बढी सिलिन्डर होल्ड

पोखरा, साउन १५  पोखरा महानगरपालिकाका प्रमुख (मेयर) धनराज आचार्यले बजारमा खाना पकाउने एलपीजी ग्यासको अभाव हुने हल्लाको पछि नलाग्न र आवश्यकताभन्दा बढी ग्यास सिलिन्डर घरमा भण्डारण नगर्न नगरवासीसँग विशेष आग्रह गरेका छन् । ​बजारमा ग्यास सकिन लागेको हल्लाका कारण उपभोक्ताहरूले आवश्यकताभन्दा बढी सिलिन्डर घरमै राख्ने (ओभर स्टकिङ) प्रवृत्ति बढेको छ । जसका कारण सामान्य अवस्थाको तुलनामा करिब ५० हजारभन्दा बढी ग्यास सिलिन्डर बजारमा फिर्ता नआएको र यसले कृत्रिम अभाव जस्तो जटिल अवस्था सिर्जना गरेको मेयर आचार्यले बताए । ​कालोबजारी र अनुचित फाइदा उठाए कडा कारबाही ​मेयर आचार्यले ग्यास विक्रेताहरूलाई पनि कृत्रिम अभाव सिर्जना नगर्न र उपभोक्ताको समस्याको अनुचित फाइदा नउठाउन सख्त चेतावनी दिएका छन् । ​ग्यासको आपूर्ति र बजार स्थितिबारे पोखरा महानगरपालिका र जिल्ला प्रशासन कार्यालय, कास्कीले संयुक्त रूपमा नियमित अनुगमन गरिरहेको जानकारी दिँदै उनले भने , "कृत्रिम अभाव सिर्जना गरेको, कालोबजारी गरेको वा अनुचित मौज्दात (स्टक) गरेको पाइएमा प्रचलित कानुनबमोजिम कडाभन्दा कडा कारबाही गरिनेछ।" ​अफवाहको पछि नलाग्न अपिल ​महानगर प्रमुखले अफवाहको भ्रममा नपरी आवश्यकताअनुसार मात्र ग्यास खरिद गर्न र प्रयोग गर्न सर्वसाधारणलाई अपिल गर्नुभएको छ । साथै, संकटको बहाना बनाएर अनुचित फाइदा उठाउने प्रवृत्तिलाई निरुत्साहित गर्न सबै नगरवासी, व्यवसायी र सरोकारवालाहरू एकजुट हुन आग्रह गरे ।